Maraming kayang gawin ang Diyos, sa anumang pamamaraang nais Niya upang ihatid sa atin ang Kanyang mga milagro.

Ang kamangha-manghang gawa ng Diyos ay hindi maitutulad ibang mga paniniwala o relihiyon. Kung ang iba'y inaalay ang kanilang buhay sa kanilang diyos upang matamo ang kaligtasan, ang Diyos ng Biblia (ng mga Kristiyano) ay naparito sa lupa, naging tao, nag-alay ng Kanyang buhay para sa kaligtasan ng lahat! Ito ay sa katauhan ni Hesus.

Makikita natin ang isa sa maraming milagrong ginawa ni Hesus sa lupa sa paralitikong naranasan ang kapatawaran at kagalingan mula sa Kanya (Lucas 5:17-26).

Ang patawarin ka ng Diyos sa kasalanan ay isang milagro na mas matimbang pa sa anumang karamdaman. Ang 'pagpapatawad' ay 'pakawalan o paalisin'. Kaya ang pagsabi ni Hesus ng pagpapatawad sa paralitiko ay nangangahulugang siya ay pinakawalan o pinalaya sa sakit nito — maging ang sakit ng kaluluwa. 

Minsan sa buhay natin, hindi natin naiintindihan ang pamamaraan ng Diyos lalo na sa panahon ng may pagsubok, problema, at sakit. Ngunit, kayang-kaya ng Diyos makapagpagaling — kahit pa sa sakit o kondisyon na kailangan nating mapagaling at makalaya. Ang Diyos ay nagpapatawad at nagbibigay ng kagalingan. 

Tulad ng mga taong nakita ng pagpapagaling ni Hesus sa paralitiko, ang ating buhay ay magiging paghanga sa pamamaraan ng Diyos. 

1. Anong mga kahanga-hangang bagay ang naranasan mo sa Diyos?

2. Bakit ganon na lang kahirap ang lumapit sa Diyos kapag tayo ay nakakaranas ng sakit at karamdaman?

3. Anong pamamaraan natin upang mas mapalapit pa tayo sa Diyos?