Ang pag-ibig at katapatan ng Diyos ay hindi kayang mapantayan.

Samu’t saring pagsubok at problema ang naranasan ni Haring David bago siya naging hari. At ang isa sa mga pinakamatindi doon ay yung ilang beses na pinagtangkaan ni Haring Saul ang kanyang buhay. Nagtyaga si David sa katatago hanggang sa lumipas ang karahasan na ito. Nagpakamatay ang tumutugis at tumutuligsa kay David. Kasunod na nangyari ay naging hari si David ng Israel. Sa dulo ng matindi at marahas na problema ni David, ang pag-ibig at ang katapatan ng Diyos ang nanaig.

Ang buhay natin, gaano man kahirap dahil sa mga problema at pagsubok, kung mananatili tayo nananalig sa Diyos, ay mararanasan natin ang resulta ng pag-ibig at ng katapatan ng Diyos. Marami ka man dahilan para sumuko, mas makatotohanan ang dahilan para manatili ka sa pananalig sa Diyos. Malabo man ang iyong natatanaw dahil sa mga problema, hindi tumitigil ang katapatan at ang pag-ibig ng Diyos kahit may mga pangyayari na hindi mo nauunawaan. Bagkus, dahil sa katapatan at pag-ibig ng Diyos, ang taong nananalig – lalo ang lumalagong Kristiyano – ay may maaasahan na tagumpay sa dulo ng laban.

Huwag sumuko sa mga laban sa buhay. Magpakatatag sa pananalig sa Diyos. Awitan ang Panginoon. Masigasig na makiisa sa mga kapwa mananampalataya na sumasamba at maglingkod sa Diyos. Punuin ang iyong isipan ng katuruan tungkol sa pag-ibig at ang katapatan ng Diyos. Umasa. Magtyaga. Ituon ang buong attention sa panukala ng Diyos sa iyong buhay. Di kalaunan, mangyayari ang planong pagpapala ng Diyos sa iyong buhay. Purihin ng buong sigla ang Panginoong Diyos sa gitna ng mga mamamayan. Walang kapantay ang pag-ibig at katapatan ng Diyos!

1. Mahalaga na nauunawaan natin ang galawan ng Diyos sa ating buhay. Ano kaya ang layunin ng Diyos sa ating mga problema’t suliranin?

2. Ano ang mga itinuturo ng Diyos sa iyo ngayon sa gitna ng iyong mga problema’t suliranin?

3. Paano magpuri sa Diyos kahit na may problema?