Mayroon ka bang malalim na tiwala sa Diyos para sumunod sa Kanyang mga utos kahit sa mga pagkakataong ikaw ay nagdadalawang isip?

Sa Psalm 119:73–88, kinikilala ng salmista ang Diyos bilang lumikha sa kanya at nagbigay ng kaalaman. Nagpapahayag siya ng pag-asa na ang mga sumusunod sa mga utos ng Diyos ay makakatanggap ng suporta mula sa mga may takot sa Diyos. Sa kabila ng kanyang mga pagsubok at kahirapan, humihingi siya ng tulong at patnubay mula sa Diyos upang manatiling tapat sa Kanyang mga utos at makarating sa kaligtasan.

Lahat tayo ay nakaranas ng mga pagkakataong nagdadalawang isip tayo sa pagsunod o paggawa ng tama. Maraming pwedeng maging sanhi ng ganitong pagdududa. Ang tunay na hamon sa ganito ay ang pagkakaroon ng malalim na tiwala sa Diyos na kahit sa mga oras ng pag-aalinlangan ay susunod pa rin tayo sa Kanyang mga utos. Sa buhay Kristiyano, naglalaban ang ating makalaman na sarili at ang Espiritu Santo. Sino ang ating susundin at pagkakatiwalaan? Ang ating sariling kagustuhan o ang utos ng Diyos? Alam natin na ang Diyos ang nagbibigay ng lakas at karunungan sa mga sumusunod sa Kanyang mga utos. Siya din ang lumikha sa atin at nagkakaloob ng kaalaman. Kahit sa gitna ng mga pagsubok at pagdududa, ang Diyos ay patuloy na nagbibigay ng patnubay at suporta sa mga tapat sa Kanyang mga aral. Sa mga sandali ng ating pag-aalinlangan, ang tiwala natin sa Diyos ang magbibigay sa atin ng lakas upang sundin ang Kanyang mga utos at manatiling matatag sa pananampalataya.

Pagtibayin ang pananampalataya sa pamamagitan ng seryosong pagsunod sa Diyos — lalo na sa oras ng pag-aalinlangan. Yakapin ang plano ng Diyos. Maghanap ng mga kapatiran na makakatulong sa iyo na manatiling matatag. Makiisa sa pagsunod. Maglaan ng oras sa pananalangin at pag-aaral ng Biblia para sa patnubay at lakas. Tanggapin ang kaliwanagan sa Salita tungo sa pagsunod sa Kanyang mga utos.

1. Ano ang mga hakbang na maaari mong gawin upang manatiling matatag sa pagsunod sa mga utos ng Diyos kahit sa gitna ng pagsubok?

2. Paano mo maipapakita ang iyong tiwala sa Diyos sa mga oras ng pag-aalinlangan?