Ang Diyos ay Tagapagligtas. Palagian niyang binabantayan ang mga sitwasyon upang mangyari pa rin ang kanyang mabuting kalooban. 

Buong pananampalataya na sinabi ni Haring David na kailangang dumating ang tagapagligtas ng Israel. Sinabi niya ito dahil pansin niya na may mga tao na nagsasabing walang Diyos. Hangal ang mga taong ito sabi ni Haring David. Pansin ni David na sa pamamagitan ng mga salita at mga gawa ng mga ‘hangal’, nagkakaroon ng paglipana ng mga gawaing masasama, pag-abuso sa kapwa, at pag-aalipusta sa Diyos. Si Haring David ay buong tiyagang nagmamasid sa kalalagayan ng paligid dahil concern siya sa mga tao – lalo na sa karangalan ng Diyos.

Kailangan ng sangkatauhan ang Diyos bilang Tagapagligtas. Maraming klase ng kasamaan ang naglipana. Nalulungkot tayong isipin na ang katiwalian, pag-abuso sa kapwa, pagsisinungaling, kawalan ng paggalang sa Diyos ay kumakalat na parang ‘virus’. Maraming napapahamak at nasisira ang buhay at dignidad dahil sa sadya o di sinadyang maling gawa at maling pananalita. Kailangan natin ng Tagapagligtas! Ang lumalagong Kristiyano ay may pag-asa sa puso. Naniniwala ang lumalagong Kristyano na mula sa langit, nakatingin ang Panginoong Diyos sa lahat ng tao. Kanyang inaalam kung may nakakaunawa ng katotohanan at naghahanap sa Kanya. Ito ay may dalang pag-asa. Darating ang Diyos bilang Tagapagligtas ng mga nananalig, sumasamba, at tumatalima sa Diyos.

Magpatuloy sa paglago bilang Kristiyano. Sumunod kay Jesus. Anuman ang mga problema o kaguluhan sa paligid, lubos na ingatan natin ang ating puso. Huwag nating hayaan na mahawa sa kahangalan ng mga tao na sadya o di sinadyang naiisip o nasasabi na “Walang Diyos”. Sa ating salita at sa ating gawa, itaguyod natin ang karangalan ng Diyos at ang kapakanan ng ating kapwa. We will never go wrong kung ang karangalan ng Diyos at ang kapakanan ng ating kapwa ang palagian nating isaalang-alang. Mahalin ang Diyos. Mahalin ang kapwa.

1. Panalangin ni David na dumating na ang Diyos bilang Tagapaglitas. Ano ang iyong naiisip sa pagiging Tagapagligtas ng Diyos?

2. Bakit may kinalaman ang Diyos bilang Tagapagligtas para sa kapakanan ng mga tao?

3. Inanyayahan mo na ba si Jesus bilang iyong Tagapagligtas at ano na ang mga binago ng Diyos sa iyong buhay?