Ang mapatawad ng Diyos ay isang dakilang karanasan. Matatanggap lamang kung may tunay na pagsisisi. Nais mo bang maranasan ang galak ng pagpapatawad ng Diyos?

Ang naranasan ni King David na pagpapatawad ng Diyos ay isang dakilang karanasan. Malakang kagalakan ang pumasok sa puso ni David dahil naramdaman niyang siya’y pinatawad na ng Diyos. Nangyari ito masayang pagkakataon sa buhay ni David nang siya ay umamin sa kanyang nagawang kasalanan at pinagsisihan niya ito. Aminado siyang hindi siya payapa at ang Diyos ay matindi ang pangungusap sa kanya hanggat hindi niya naihayag ang kanyang pagkakamali. Kalaunan, dahil ang kasalana’y kanyang kusang ipinagtapat at hindi itinago, naranasan niya ang kapatawaran ng Diyos.

Kakaiba ang feeling na masigurado nating pinatawad na tayo ng Diyos. Sa kabilang banda, may ‘emotional suffering’ kapag may kasalanang hindi naipapahayag sa Diyos – lalo kung may inaalagaang kasalanan. Interesting isipin na sa isang tunay at lumalagong Kristiyano, na hindi tayo tatantanan ng Diyos hanggat hindi natin nagagawa na pagsisihan ang mga nagagawang kasalanan. Kaya nga nasabi ni Haring David “ngunit sa wakas, ipinagtapat ko ang aking mga kasalanan sa inyo; hindi ko na ito itinago pa.” Kapag ating ipinagtapat at hindi pilit na itinago sa Diyos ang kasalanan, doon dumarating ang dakilang karanasan ng pagpapatawad ng Diyos! 

Aminin at ipagtapat ang iyong kasalanan sa Diyos. Mararanasan mo ang isang dakilang pakiramdam ng kagalakan. Pagsisihan o talikuran ang iyong kasalanan. Mararanasan mo naman ang pagbabago ng buhay at bagong lebel ng paglago sa Panginoon. Pag-alabin ang ating relasyon sa Diyos. Maging malinis sa Kanyang harapan. Hindi mahalaga ang opinyon ng tao. Ang pinakamahalaga ay lumalago ka sa pagsamba at pagsunod sa Diyos – ng may tunay na pagsisi, pagbabago, at pagiging malapit sa Diyos.

1. Ano ang ibig sabihin ni David nang kanyang sabihin na, “Ngunit sa wakas, ipinagtapat ko ang aking mga kasalanan sa inyo; hindi ko na ito itinago pa.”?

2. Bakit napakahalaga ng kapatawaranan ng Diyos?

3. Papaano mararanasan ang kapatawaranan ng Diyos?