Sa ating pang-araw-araw na buhay, may isang napaka importanteng katanungan na dapat nating sagutin, “Sino ba talaga ang Diyos at bakit ko siya dapat sambahin?”

Ayon sa Isaiah 6, ang sigaw ng mga nilalang na pumapaligid sa makapangyarihang Diyos ay, “Banal, Banal, Banal, ang PANGINOONG Makapangyarihan! Ang kapangyarihan niyaʼy sumasakop sa buong mundo.” Ito ay isang panyayari na nagpapahayag ng pagsamba o paghanga sa Diyos -- sa Diyos na banal at makapangyarihan! At ang kabanalan at kapangyarihan ng Diyos ay ‘sumasakop sa buong mundo’. Ito ay isang katotohanan na dapat tanggapin at paniwalaan ng lahat ng tao. Ang katotohanang ito ay nabigyan pansin ni propeta Isaias. Mababasa na napansin niya agad ang kanyang kasalanan kumpara sa kabanalan ng Diyos (v.5).

Sa ating pang-araw-araw na buhay, ang kabanalan at kapangyarihan ng Diyos ay andyan lamang. Pero napapansin ba natin na hindi sumasamba ng nararapat ang maraming tao? Dalawang dahilan: hindi pa nasasabi sa kanila ng maayos na ang Diyos ay banal at makapangyarihan at dapat sambahin. O kaya’y hindi lang talaga binibigyang pansin ng marami tao na ang Diyos ay banal at makapangyarihan. Kaya, di tumutugon ng may pagsamba at pagsunod. Ito ay napakalungkot na mga pangyayari.

Ito ngayon ang pinakamahalaga, tayo ay masidhing tinatawag na sumamba ng may pagsunod sa Diyos -- sa Diyos na tunay na banal at makapangyarihan. Simula ngayong araw, payagan natin na mas sakupin ng Diyos ang ating mga puso. Payagan natin Siya na sakupin ang ating buong buhay. Inaantabayanan ng Diyos na tayo'y sumamba ng may paghanga at sumunod sa kanyang kalooban ng buong puso. Tunay na may galak sa pagsamba at pagsunod sa Diyos.

1. Anong ibig sabihin na ang Diyos ay banal at makapangyarihan?

2. Ano ang tunay na pagsamba at tunay na pagsunod?

3. Bakit ang tunay na pagsamba ay nagdudulot ng tunay na pagsunod?

4. Ikaw ba ay satisfied na sa level ng iyong pagsamba at pagsunod sa Diyos? Bakit?