Panalangin ni Haring Solomon na ang kanyang paghahari ay pagpalain ni Yahweh – ang Diyos ng Israel. Kasama na dito ang pagdami ng mamamayan, ang malagong pananim at pag-ani, at mga lungsod na mauunlad. Higit sa mga pagpapala na ito, ang dapat mapansin ay ang Kanyang naisin na ang mga bansa ay lumapit at dumalangin din sa Diyos ng Israel.

Ang buhay ay hindi kumpleto kung wala ang pagpapala ng Diyos. Kalooban ng Diyos na mga tao’y Kanyang mapagpala maging ng materyal na bagay. Unawain natin ito sa isang kwento: minsan ay may isang  tao na nagsabing mas mahalaga ang pagsamba sa Diyos kaya ok lang kahit hindi na tayo pagpalain ng Diyos. Maraming naniwala sa kanya kasi siya’y tunog espirituwal. Kaya kumalat ang ganitong pananaw at tinanggap na paniniwala ng maraming tao. May dapat unawain patungkol sa pagpapala ng Diyos at sa Kanyang kagustuhan na tayo’y pagpalain. Delikado ang buhay ng tao na nais yumaman pero hindi makadiyos ang pamumuhay. Mali din naman na sumasamba sa Diyos kahit hindi na tayo pagpalain ng Diyos. Ibaling natin ito sa katotohanan na kailangan ng pananalig sa Diyos na may tamang pag-uugali at tamang intensyon sa paghingi ng pagpapala mula Diyos.

Unawain at tanggapin natin na gusto ng Diyos na tayo’y pagpalain. Kaya humingi ng may tamang pag-uugali at tamang intensyon. Talunin ang pagiging makasarili. Maging makadiyos sa iyong paghingi ng pagpapala mula sa Diyos. Kapag mas naunawaan mo ang puso ng Diyos at bakit Ka Niya gustong pagpapalain, magiging tama ang iyong pananaw gaano man kalaki o kaliit ang iyong materyal kayamanan. Ito ay dahil bukod sa nagiging makadiyos na ang iyong layunin, hindi ka pa nagiging makasarili. 

1. Ano ang meron sa pagiging makadiyos at sa pagpapala ng Diyos?

2. Ano ang kaugnayan ng pag-asenso kumpara sa pagtuturo sa mga tao na mapalapit sa Diyos?

3. Paano parangalan ang Diyos sa mga ibinibigay Niyang pagpapala?