Kung tanaw sa Sangnilikha ang kadakilaan ng Diyos, naipapahayag ba ito ng mga salinlahi?

Sa Psalm 145, isinulat ni David, pinuri ang kadakilaan at kabutihan ng Diyos. Inilalarawan ang Kanyang mga gawa, pag-ibig, at pagkakalinga, na nagbibigay ng pagkain at kaligtasan. Tinatampok ni David ang nararapat na pagsamba at papuri sa Diyos ng bawat salinlahi.

May limang generasyon na bahagi ang sinuman sa atin ngayon: Ang Baby Boomers (1946-1964), Generation X (1965-1980), Millennials (1981-1996), Generation Z (1997-2012), at Generation Alpha (2013 at pataas). Bawat salinlahi ay may kanya-kanyang pananaw tungkol sa Diyos. Bagaman may mga pagkakapareho, tiyak na may mga pagkakaiba rin. Nakasalalay ang mga pananaw na ito tungkol sa Diyos base sa ating mga karanasan at pagpapalaki. Sa kabila ng mga pagkakaibang ito, patuloy na nagpapakilala ang Diyos sa atin. Sa ating buhay, ang Diyos ay masigasig na nagtatanim ng mga palatandaan, mga pangyayari, at mga tao upang mapansin natin Siya. Ang Diyos ay nanawagan sa atin at ibinigay Niya na rin ang Biblia, ang Kanyang Salita. Para sa mga mananampalataya kay Jesus, nariyan ang Banal na Espiritu na patuloy na nangungusap at nagtuturo sa atin araw-araw. Ang Diyos Ama ay buong tapat din na nagkakaloob ng Kanyang biyaya sa atin. Napansin mo na ba ang Diyos sa tamang paraan? Itutuloy-tuloy mo na ang daily devotions mo faithfully para mas makilala mo Siya at maihayag mo Siya sa iba.

Maging mapanuri! Gawin ang iyong daily devotions upang mas makilala mo ang Diyos. Maglaan ng oras para sa Biblia, panalangin, at pagninilay-nilay. Ibahagi ang iyong karanasan sa iba. Maging inspirasyon sa pamilya at komunidad. Tumulong sa misyon ng simbahan para abutin ang mga tao at mabahaginan ng Salita. Ipakita ang iyong pananampalataya sa gawa at huwag mag-atubiling tumawag sa Diyos. Maging mga salinlahi tayo na nagpapahayag ng kadakilaan ng Diyos. Kumilos at makibahagi. Ngayon na ang tamang panahon!

1. Ano ang iyong mga pananaw at paniniwala tungkol sa Diyos?

2. Sino ang mga tao sa iyong buhay na nagsilbing mga palatandaan ng presensya ng Diyos sa kabila ng mga pagsubok?

3. Bakit mahalaga para sa iyo ang paggawa ng daily devotions upang mas makilala ang Diyos?

4. Paano mo maibabahagi ang iyong pananampalataya sa iba upang maging inspirasyon at makapagbigay ng pag-asa sa ibang tao?