Tumutugon ng gabay at pagliligtas ang Panginoon sa mga tao na may takot o paggalang sa Diyos.

Alam ni Haring David ang pakahulugan ng pagkakaroon ng takot o paggalang sa Diyos. Alam ni David base sa pananampalataya at karanasan na ang Diyos ay gumagabay at nagliligtas sa mga may respeto sa Diyos. Tuwing nanalangin sila, alam ni David na ang Diyos ay nakikinig. Ang Diyos ay makapangyarihan.

Bahagi ng buhay Kristiyano ang paglago sa paggalang at pagrespeto sa Diyos. Ang mga salitang ‘takot sa Diyos’ sa panahon ng Old Testament ay mas unawa natin sa mga salitang paggalang at pagrespeto. Ang isang lumalagong Kristiyano ay may lumalagong ‘takot sa Diyos’. Tayong mga tao ay kailangang may paggalang at pagrespeto sa Diyos. Silang mga may ‘takot sa Diyos’ ay natututo na ibaling ang pansin sa Diyos tuwing may sakuna, problema, pag-uusig, o banta sa kaayusan at kapayapaan. Habang lumalago ang isang tao sa ‘takot sa Diyos’, siya ay lumalago din sa pananalig at pagtitwala sa Diyos. Maaaring siya ay malungkot o nabagabag. Ngunit ito ay panandalian lamang dahil kayang ibaling ang kanyang attention sa katapatan at kapangyarihan ng Diyos. Ganyan ang mga tunay na Kristiyano na may tunay na ‘takot sa Diyos’.

Ibaling ang attention mo sa Diyos. Ang Panginoon ay mas makapangyarihan kesa sa anumang problema. Bigkasin ang Salita ng Diyos sa iyong kalalagayan. Umawit sa Diyos ng may sigla at kapanatagan. Ipagyabang ang Diyos sa mga kwentuhan. Kapag may tanong sa iyong isipan, magtanong pero huwag pagdudahan ang Diyos. Umangat sa pagrespeto sa Diyos upang ang iyong pag-aalinlangan ay maglaho. Igalang ang Diyos ng may pagsamba at pagsunod. Igalang ang Diyos at si Jesus ng higit sa lahat.

1. Ano ang ibig sabihin ng mga salitang ‘takot sa Diyos’?

2. Bakit napakahalaga sa isang Kristiyano ang matutunan na gumalang o mag-respeto sa Diyos?

3. Paano lumago sa paggalang o pag-respeto sa Diyos?