Ang pagpako kay Hesus sa krus ay para akuin ang ating mga kasalanan. At ang sugat naman Niya ay para sa ating kagalingan. 

Si Apostol Pedro ay nagpapaalala sa mga mananampalataya na may pangako ng kapatawaran at kagalingan mula sa Diyos. Ang kapatawaran ay dahil sa pagkapako ni Hesus. At ang kagalingan naman ay mula sa mga sugat Niya. Mapapansin din sa talata na may karugtong itong motibo kung bakit inako ni Hesus ang kasalanan. Ayon kay Pedro, ito ay para iwanan na ng mananampalataya ang buhay na makasalanan. Hindi lang iwanan na ang buhay na makasalanan, kundi ang mamuhay ng matuwid para sa Diyos. Napakalinaw para kay Pedro, na ang kapatawaran ng ating mga kasalanan at kagalingan mula sa ating mga sakit ay para ang Diyos ay maparangalan dahil sa ating pagsunod sa Kanya. 

Kung papansin natin ang ating buhay ngayon, may ilang mga katanungan na dapat nating isaisip: Alam ko ba talaga ang halaga na kailangang bayaran ni Hesus para ako ay mapatawad? Nauunawaan ko ba ang sakripisyo ng dinaanan ni Hesus para sa aking kapatawaran at kagalingan? Anong kasalanan o pagsuway ang namamayani sa akin na kailangan kong mapagtagumpayan para ako ay talagang mamuhay ng matuwid o masunurin sa Diyos?

Ngayong Holy Week, kailangan nating mangilin. Manahimik at mag-isip-isip kung nasan na tayo sa ating pakikitungo sa Diyos. Tayo ay dapat na may tunay at lumalalim na relasyon sa Diyos. Sa loob ng relasyon na ito ay dapat na matamasa natin ang kapatawaran sa kasalanan. Maging ang kagalingan sa anumang pisikal o emosyonal na karamdaman. Magalak ang buhay kung parehong may kapatawaran at kagalingan mula sa lumalalim na relasyon sa Diyos.

1. Alam mo ba talaga ang halaga na kailangang bayaran ni Hesus para tayo ay mapatawad sa ating mga kasalanan? 

2. Gaano mo nauunawaan ang sakripisyo na dinaanan ni Hesus para sa ating kapatawaran at kagalingan? Ipaliwanag.

3. Anong kasalanan o pagsuway ang namamayani sa iyo na kailangan mong mapagtagumpayan para ikaw  ay talagang mamuhay ng matuwid o masunurin sa Diyos?