Malaki ang kalamangan sa buhay ng mga taong umaasa at nagtitiwala Sa Diyos. 

Si David bilang hari ay araw araw na humaharap mga hamon o suliranin sa kanyang pamumuno. May mga kaguluhan na kinakailangang niyang harapin, mga pagsubok na kailangan niyang suungin, mga situwasyon na kailangan niyang pagdesisyunan. Sa lahat ng ito ang hiling ni David sa Diyos ay gabayan ang kanyang puso, proteksyunan ang kanyang mga nasasakupan, at sagutin ng Diyos ang kanyang mga kahilingan. Naniniwala si Haring David na ang Diyos ang pinangagalingan ng kanyang mga tagumpay. Kaya lalong nagtitiwala si Haring David sa Panginoong Diyos kesa sa mga anumang bagay sa paligid. 

Tayo ay tinatawag na umasa at magtiwala sa Diyos. Kahit may mga nakikita tayong mga bagay, mga tao, o mga pamamaraan na sa ating palagay ay mas high tech at parang mas makakatulong sa atin, ang Diyos pa rin ang ating asahan at pagtiwalaan. Ang nagtitiwala sa Diyos ay mas malayo ang nararating. Ang umaasa sa Diyos ipagtatanggol ng Diyos. Hindi babalewalain ng Diyos ang ating pagtitiwala sa kanya. Gagalaw at gagalaw siya. Gagawa ang Diyos ng paraan para tayo ay bigyang tagumpay. Alalahanin ng Diyos ang anumang sakripisyo natin para sa Kanya. Ililigtas ng Diyos ang Kanyang mga anak na umaasa sa Kanya. 

Umasa tayo sa Diyos. Alam ng Diyos kung sino ang may tiwala sa Kanya. Maliit man ang ating pananampalataya, igagalang ng Diyos ang ating pagkilala, pagsamba at paglilingkod sa Kanya. Magtiwala sa Diyos. May mga bagay at mga tao man na maaaring paglagakan ng ating tiwala, pero  iba pa rin kung si Lord ang ating ‘source of hope’. May kakayanan ang Diyos na gawin ang lahat ng kanyang mga pangako. Kaya, mas laliman natin ang pakikipag-niig sa Diyos. Sanayin ang ating puso’t isipan na magfocus sa Diyos. Anumang umaagaw ng ating pansin, iwaksi na ito at tumutok sa ating relasyon sa Diyos.

1. Ano ang nararapat na ugali natin sa paglapit sa DIyos?

2. Bakit may mga tao na pilit ginagawan ng paraan ang kanilang pagtatagumpay o success sa buhay?

3. Papaano nagiging legit o totoo ang ating pagtitiwala sa Diyos?