Ito ang hindi dapat ikahiya: Ang kayang gawin ng pananampalataya sa Diyos dahil sa Magandang Balita para sa ikakaayos ng relasyon ng tao sa Diyos.

Dumating sa punto ng buhay ni Apostle Pablo na nasabi niyang hindi niya kayang ikahiya ang Salita ng Diyos, ang ‘gospel’ o ang Magandang Balita. Ang Magandang Balita ay may kakayanan na ipakita na pwedeng ituwid o iayos ng Diyos ang “kaugnayan ng tao sa Kanya”. At ito ay sa pamamagitan ng pananampalataya na “buhat sa simula hanggang sa wakas.” May kayang gawin ang pananampalataya sa Diyos dahil sa Magandang Balita para sa ikakaayos ng relasyon ng tao sa Diyos. At kung babasahin natin ang Romans chapters 1 and 2, mauunawaan natin na si Hesu-Kristo ang tinutukoy sa Magandang Balita. Ang sakripisyo at pagkabuhay na muli ni Hesus ay may kinalaman bakit sobrang powerful ang Magandang Balita … at hindi dapat ikahiya!

Ang taglay na katotohanan ng Magandang Balita ay ang pag-aayos o pagtutuwid ng relasyon ng tao sa Diyos. May mga bagay sa buhay natin na dapat ikahiya. Alam natin ito. Ngunit ang Magandang Balita ng Diyos para sa mga tao ang may taglay na katotohanan na hindi dapat ikahiya. Ang katotohanan ay pwedeng maging matuwid o ‘righteous’ ang isang tao sa harapan ng Diyos sa pamamagitan lamang ng pananampalataya.

Dapat tayong makumbinsi sa makapangyarihang katotohanan ng Magandang Balita. Huwag itong ikahiya. Bagkus sa ating puso’t isipan ay lubos na unawain ang kakayanan nitong baguhin para sa ikabubuti ang buhay ng tao. Maaaring may nag-aantay ng kamag-anak o kaibigan mo sa ibabahagi mo. At higit sa lahat, hindi mo kailangang gawing makapanyarihan ang Magandang Balita. Ito ay makapangyarihan na. Kailangan mo na lamang ikwento ng maayos sa iba. 

1. Ano ang maganda sa Magandang Balita?

2. Papaano natin magagawa na ibahagi ang Salita ng Diyos sa ibang tao?