Alam mo ba na ikaw ay binabantayan at inaalagaan ng Diyos?

Ang Psalm 95 ay isang awitin ng imbitasyon na magpuri at sumamba sa Diyos. Ang manunulat ay buong sigla na inihayag ang kadakilaan ng Diyos, ang katapatan ng Diyos, at ang pagiging manlilikha ng Diyos. Nais ng manunulat na ang kanyang bayan na inaalagaan at binabantayan ng Diyos ay tumalima sa panawagan ng Panginoon. Ang nakakalungkot ay hindi tumalima ang bayan ng Diyos. Bagkus sila ay nagmatigas ng mga puso. 

May panawagan ang Diyos sa atin at sa lahat. Tayo ay pwedeng tumugon ng may pagtalima, o di kaya’y tumalikod ng may matigas na puso. Kaya may panawagan ang Diyos sa atin ay dahil nais Niya tayong mas mabantayan at mas maalagaan. Bigyan halimbawa natin ito sa pamamagitan ng ating mga magulang. Sila din ay binabantayan at inaalagaan tayo. Ginagawa nila ang pagbabantay at pag-aalaga sa atin sa halos lahat ng panahon. Ngunit may mga pagkakataon habang tayo ay lumalaki at mas nagkakaisip, tayo ay natututong lumayo at sumuway sa kanila. Sa ganoong mga pangyayari, hindi magawa o kaya’y limitado ang nagagawang pagbabantay at pag-aalaga ng ating mga magulang. Sa ganitong mga pagkakataon, tayo ay pwedeng magdusa ng ‘consequences’ dahil sa ating pagsuway. Ngayon, pwedeng palaisipan ito sa atin. Kasunod nito ay ang tanong na kaya ba tayong ingatan ng Diyos maski sa ating pagsuway at pagmamatigas ng puso? 

Ito ang ating nararapat na gawin: tumugon sa panawagan na sumamba at maglingkod sa Diyos. Ang panawagan ay ‘available’ pa rin. Kaya huwag hayaang tumigas ang ating puso dahil sa pagsuway, kalayawan, o pagiging makamundo. Pansinin ang mga Salita ng Diyos na ating naririnig at nababasa. Mas lumalim sa pagsamba, masigasig sa paghayag ng Salita, masipag sa paglilingkod, at mainit sa pagpuri at pagsamba sa Diyos. Ngayon na! Huwag ipagpabukas. Sumamba na at maglingkod sa Diyos!

1. Bakit may paghihirap, pighati, o pagdurusa sa buhay kung tayo ay binabatayan at inaalagaan naman ng Diyos?

2. Kaya ba tayong bantayan at alagaan ng Diyos kahit sa kalagitnaan ng ating pagsuway at pagmamatigas ng puso?

3. Paano tayo binabatayan at inaalagaan ng Diyos?