Ang maging priority mo ang Diyos, tiyak na mananatili ka sa Kanya, at ang ugaling mapaghintay ay may kasunod na siguradong tagumpay.

Walang anumang ginawa si Josaphat kundi ang lumapit kay Yahweh nang sila ay lusubin ng maraming bansa. Nanawagan siya sa lahat ng tao sa bawat lunsod ng Israel na mag ayuno, sumamba at magpuri sa Diyos. Tinipon niya sila sa templo upang sa gayon mapaalala niya kay Yahweh ang kanyang mga pangako na kung sila ay sa kagipitan na sitwasyon ay tutulungan sila. Hindi nag atubiling sumagot si Yahweh sa pamamagitan ni Jahaziel. Sinabi ni Yahweh na huwag silang matakot at masiraan ng loob, dalawang beses itong sinabi (vv.15, 17). Sa umpisa pa lamang na nalaman ni Josaphat na nilusob sila, nabahala na siya. Ngunit may strategy si Josaphat upang mawala ang ganitong pag alala. Iyon ay ang lumapit kay Yahweh.

Ang unahin ang Diyos, manatili sa Kanyang mga pangako, at maghintay sa Kanyang timing ay mga mahahalang sangkap sa buhay ng isang matagumpay na Kristiano. Kahit tayo ay maraming kinakaharap na problema o pagsubok, hindi pa rin ito sapat upang mawalang saysay ang mga pangako ng Diyos sa pamamagitan ng Kanyang Salita. Ang maipanalo ang sitwasyon ay hindi galing sa anumang lakas. Ang Diyos mismo ang gumaganap ng Kanyang gawain upang mapangyari at makamit ang katagumpayan.

Matuto tayong umayon sa Salita ng Diyos na unahin Siya sa lahat ng bagay (Matt 6:33). Manatili tayo sa Kanyang mga pangako sa paraan na panghawakan natin ang Kanyang Salita. Humaharap man tayo sa maraming pagsubok at maging sa kagipitan, tutugon at tutugon ang Diyos sa paglapit natin sa Kanya. Ipagkatiwala sa Diyos ang anumang sitwasyon. Hintayin natin ang Kanyang timing at ang Kanyang gagawin. Part natin ang sambahin at purihin Siya. Ang sa  gayon, ang kaluwalhatian ay para lamang sa Kanya at atin ang pananalangin.

1. Ano ang sinasabi sa atin ng 2 Cronicas 20:17 pagdating sa katagumpayan na tatamasahin ng mga nagtitiwala sa Diyos?

2. Bakit napakahalaga ang unahin ang Diyos, manatili, at maghintay sa Kanyang gagawin?

3. Hadlang ba ang takot sa katagumpayan? Ipaliwanag.