Ang lahat ay aalugin upang subukin. Ang nananatiling nakatayo ay buhay na matatag at matibay sa ibabaw ng pundasyong-bato na si Kristo-Hesus.

Ang talata natin ay pagpapahayag ni Hesus tungkol sa isang taong nagtayo ng bahay. Ang taong ito’y nakikinig at nagsasagawa ng Kanyang salita. Ang tao ay humukay ng malalim at itinayo niya ito sa ibabaw ng bato. At sabi ng Panginoon, ang bahay na ito ay nasubukan sa pamamagitan ng baha at bugso ng tubig ngunit ito ay nananatili pa ring matatag at matibay.

Si Kristo-Hesus ang “pundasyong bato” na sinasabi ng talata. Kung ang buhay kristiano natin ay nakatayo sa pundasyon ng Kanyang Salita, anumang pagsubok ang dumating nananatili pa rin itong matatag at matibay. Kay Kristo-Hesus lang matatagpuan ang kasiguruhan at ang tunay na katagumpayan. Ito ay nasisigurado sa pamamagitan lamang ng pakikinig ng Kanyang salita at pagsasapamuhay nito. Sa Kanya lang din mararanasan ang tunay na kaligayahan na pagkatapos ng pagsubok na ito ay nagdadala ng ibat-ibang ibang pagpapala. Kaya sa paglilingkod lamang kay Kristo-Hesus ang buhay ay tunay na to the max.

Totoong hindi madali ang “pagtatayo ng bahay sa pundasyong bato” kailangan natin ng equipment upang makapaghukay at maitayo ito. Ang Salita ng Diyos at ang pananalangin ang ating gamit upang maisagawa ito. Kailangan nating ilapit ang ating sarili sa Diyos at sa Kanyang Salita. Huwag nating hayaan na may kahati ang ating oras sa pagpapalago ng ating relasyon kay Hesus at sa Kanyang mga Salita.

1. Bakit itinulad ni Kristo ang mga taong lumalapit sa kanya, nakikinig at ginagawa ang kanyang salita sa isang taong humukay at nagtayo ng bahay sa ibabaw ng pundasyong bato?

2. Ano dapat ang respond natin pagdating sa paghihikayat sa atin upang aralin ang Bibliya?

3. Bakit konektado ang tunay na kaligayahan at katagumpayan sa paglilingkod sa Diyos?